skip to Main Content
ᐱᓇᓱᒉᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ

ᑲᑎᕕᒃ ᐃᓕᓴᕐᓂᓕᕆᓂᖅ ᐃᓕᓴᕐᓂᓕᕆᕕᐅᕗᖅ ᓄᓇᕕᒻᒥ, ᓄᐃᑕᐅᔪᕕᓂᖅ 1975-ᒥ, ᔦᒥᔅ ᐯ ᐊᒻᒪᓗ ᑯᐯ ᑕᕐᕋᖓᓂ ᐊᖏᖃᑎᒌᓐᓂᑯᑦ.

(ᔦᒥᔅ ᐯ ᐊᒻᒪᓗ ᑯᐯ ᑕᕐᕋᖓᓂ ᐊᖏᖃᑎᒌᓐᓂᖓᒍᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᐱᒍᓐᓇᐅᑎᖃᑎᑕᐅᕗᖅ ᐊᒻᒪᓗ ᐊᐅᓚᑦᓯᒍᓐᓇᕕᖃᕐᓱᓂ ᐱᕙᓪᓕᐊᑎᑦᓯᓂᕐᒥᒃ ᐊᒻᒪᓗ ᐱᒍᑦᔨᒍᓐᓇᓂᕐᒥᒃ ᐊᑦᔨᐅᖏᑦᑐᒥᒃ ᐃᓕᓐᓂᐊᓂᓕᕆᓂᕐᒧᑦ ᐱᒍᑦᔨᒍᑎᓂᒃ ᐊᒻᒪᓗ ᐃᓕᓐᓂᐊᑎᑦᓯᓂᕐᒥᒃ ᐃᓄᐃᑦ ᐃᓗᕐᖁᓯᖓᓅᓕᖓᔪᓂᒃ. ᐱᓇᓱᐊᕐᑕᖓ ᑲᑎᕕᒃ ᐃᓕᓴᕐᓂᓕᕆᓂᐅᑉ ᑌᒣᒻᒪᑦ ᒪᕐᕉᓕᖓᕗᖅ. ᐁᑉᐹᒍᑦ, ᐱᓇᓱᐊᕐᓂᓕᒃ ᓄᓇᓕᓕᒫᓂ ᐃᓕᓴᕐᓂᓕᕆᕕᐅᑦᓱᓂ ᐃᓘᓐᓇᖏᓐᓄᑦ ᓄᓇᕕᒻᒥᐅᓄᑦ. ᐁᑉᐹᒍᓪᓗ.

1978-ᒥᓂᑦ, ᑲᑎᕕᒃ ᐃᓕᓴᕐᓂᓕᕆᓂᖅ ᑖᓐᓇᑑᑦᓱᓂ ᐃᓕᓐᓂᐊᓂᕐᒥᒃ ᐱᒍᑦᔨᔨᑑᓯᒪᕗᖅ ᐃᓄᖏᓐᓄᑦ ᓄᓇᕕᒻᒥᐅᑦ. ᐃᓕᓐᓂᐊᑎᑦᓯᒍᑏᑦ ᐋᕐᕿᓱᕐᑕᐅᓯᒪᔪᑦ ᐃᓕᓴᕐᓂᓕᕆᓂᕐᒧᑦ ᐃᓕᓐᓂᐊᑎᑦᓯᒍᑕᐅᓲᖑᕗᑦ ᐃᓘᓐᓇᖏᓐᓄᑦ ᐃᓕᓐᓂᐊᕕᓐᓄᑦ 14-ᓂ ᓄᓇᓕᖏᓐᓂ ᓄᓇᕕᒻᒥ, ᐃᓄᑦᑎᑐᑦ ᐅᖃᐅᓯᖓ ᓯᕗᓪᓕᐅᑎᓪᓗᒍ ᐊᒻᒪᓗ ᐅᐃᒍᐃᑎᑐᑦ ᖃᓪᓗᓈᑎᑐᓪᓗ ᐅᖃᐅᓯᐅᑉ ᐁᑉᐱᐅᑎᒋᔭᖏᓐᓂ. ᐃᓕᓴᕐᓂᓕᕆᓂᖅ ᐃᖏᕐᑎᑦᓯᔪᖅ 17-ᓂᒃ ᐳᒃᑭᓂᕐᓴᒥ ᐃᓕᓐᓂᐊᕕᓐᓂᒃ ᐊᒻᒪᓗ ᐳᕐᑐᓂᕐᓴᒥ ᐃᓕᓐᓂᐊᕕᓐᓂᒃ ᐃᓚᐅᑎᓪᓗᒋᑦ ᑕᓪᓕᒣᑦ ᐃᓄᒻᒪᕇᑦ ᐃᓕᓐᓂᐊᕕᖏᑦ.

ᐱᑦᔪᑎᖃᕈᑎᒥᒃ ᓇᓗᓀᕐᓯᐅᑎᕗᑦ

ᐱᑕᖃᕐᑎᓯᓗᓂ ᐃᓄᖏᓐᓂᒃ ᓄᓇᕕᒻᒥ ᐃᓕᓐᓂᐊᓂᓕᕆᓂᕐᒥᒃ ᐱᒍᑦᔨᒍᑎᓂᒃ ᓯᕗᓕᓚᖓᔪᓂᒃ ᐊᒻᒪᓗ ᐱᒍᓐᓇᓯᑎᑦᓯᓗᑎᒃ ᐃᓘᓐᓇᖏᓐᓂᒃ ᐃᓕᓐᓂᐊᑎᓂᒃ ᐱᕙᓪᓕᐊᑎᑦᓯᓂᕐᒥᒃ ᐱᐅᓂᕐᒥᒃ, ᐱᒍᓐᓇᓯᐊᕐᓂᒥᒃ ᐊᒻᒪᓗ ᐱᓯᑎᐅᓂᕐᒥᒃ ᐱᑕᖃᕆᐊᓕᓐᓂᒃ ᖃᓄᐃᖕᖏᓯᐊᕐᓂᒧᑦ ᐊᒻᒪᓗ ᐃᒻᒥᓂᒃ ᐱᖕᖑᓯᐊᕈᑎᒋᓗᒋᑦ.

ᓯᕗᓂᕐᒥ ᐱᒐᓱᐊᕈᒪᔭᑦᑎᓂᒃ ᓇᓗᓀᕐᓯᐅᑎᕗᑦ

ᓄᓇᕕᒻᒥᐅᑦ ᐱᒍᓐᓇᓯᑎᑕᐅᓯᒪᑦᓱᑎᒃ, ᐅᐱᒋᔭᖃᕐᓱᑎᒃ ᐊᒻᒪᓗ ᐃᒥᓂᕐᓱᕈᓐᓇᓱᑎᒃ ᐃᓚᐅᔪᑦ ᐃᓗᓯᕐᓱᓯᐊᕐᑐᓄᑦ ᓄᓇᓕᓐᓄᑦ ᑐᖕᖓᕕᖃᕐᓱᑎᒃ ᐃᓄᐃᑦ ᐃᓪᓕᕆᔭᖏᓐᓂᒃ, ᐅᖃᐅᓯᖓᓂᒃ ᐊᒻᒪᓗ ᐃᓗᕐᖁᓯᖓᓂᒃ, ᐱᒍᒪᓕᕐᑎᑕᐅᑦᓱᑎᒃ ᐱᒍᓐᓇᓯᓂᕐᒥᒃ ᐃᓘᓐᓇᖓᓂᒃ ᐱᒍᓐᓇᑕᒥᓂᒃ ᐃᓘᓐᓈᒍᑦ ᑕᑯᓐᓇᓂᑎᒍᑦ.

ᐃᓕᓐᓂᐊᓂᓕᕆᓂᕐᒥ ᑐᕌᕐᓂᕗᑦ

ᐃᓕᓴᕐᓂᓕᕆᓂᕐᒥ, ᑐᕌᕐᓂᖃᕐᑐᒍᑦ ᐃᓕᓐᓂᐊᓂᓕᕆᓂᕐᒥ ᐃᓘᓐᓇᖏᓐᓂᒃ ᑕᑯᓐᓇᓱᑕ. ᐱᒍᑦᔨᒍᑏᑦ ᐱᑕᖃᕐᑎᑕᕗᑦ-ᐃᓚᒋᔭᐅᑎᓪᓗᒋᑦ ᐃᓕᓐᓂᐊᕈᑎᓕᐊᖑᓲᑦ ᐊᒻᒪᓗ ᐃᓕᓐᓂᐊᑎᑦᓯᒍᑏᑦ ᐋᕐᕿᓱᓲᕗᑦ-ᑐᖕᖓᕕᓖᑦ ᐃᓄᐃᑦ ᐅᖃᐅᓯᖓᓂᒃ ᐃᓄᒍᐃᓂᕐᒥᒃ, ᐃᓕᓐᓂᐊᓂᓕᕆᓂᐅᑉ ᐃᓗᐊᓂ ᐱᕈᕐᐸᓕᐊᑎᑦᓯᓂᐅᑦᓱᓂ ᐃᓄᒻᒥᒃ ᐃᓗᐃᑦᑐᒥᒃ ᐃᓚᐅᑎᑦᓱᒍ ᑐᕃᓐᓇᑐᒥᒃ ᐊᕙᑎᖓᓄᑦ ᓄᓇᓕᖓᓄᓪᓗ.

ᐃᓚᖏᑦ ᐃᓕᓐᓂᐊᑎᑦᓯᔨᕗᑦᑕ ᐅᖃᐅᓯᑦᓴᖏᑦ.

Photo Byᐱᓇᓱᐊᕐᓯᒪᕗᖓ ᐊᕐᕌᒍᓂ ᓯᑕᐅᒪᔪᖕᖏᒐᕐᑐᑦ ᕿᑎᕐᖃᖓᓂᓪᓗ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ. 2010-ᒥᑦ 2017-ᒧᑦ ᐱᓇᓱᐊᕐᓱᖓ ᓴᓪᓗᓂ, ᑭᓯᐊᓂ 2017-ᒥ ᐃᓗᓯᖃᑦᓯᐊᓂᕐᒧᑦ ᐃᓕᓐᓂᐊᕖᑦ ᖃᐅᔨᒪᔨᐅᓂᕐᒧᑦ ᐃᓂᖓᓅᕐᓯᒪᕗᖓ ᑰᑦᔪᐊᒥ ᐃᓂᓕᒻᒧᑦ. – ᐱᓇᓱᐊᕐᑎᓯᓂᓕᒃ ᐅᕙᓐᓂᒃ ᓄᓇᓕᓕᒫᓂ.

ᓄᓇᖃᕐᖄᓯᒪᔫᓇᖓ ᑲᓇᑕᒥᐅᔭᐅᑦᓱᖓ ᑕᕐᕋᓕᐊᕐᓯᒪᕗᖓ ᐃᓕᑦᓯᒋᐊᕐᑐᓱᖓ ᖃᐅᑕᒫᑦ ᐃᓅᓯᖏᓐᓂᒃ ᓄᓇᖃᕐᖄᓯᒪᔪᑦ ᐃᓄᐃᑦ ᐃᓅᓯᖏᓐᓂᒃ, ᑕᑯᒋᐊᕐᑐᓱᖓᓗ ᐱᐅᓯᕆᓯᒪᔭᖏᓐᓂᒃ ᑲᓇᑕᐅᑉ ᐱᕙᓪᓕᐊᓯᒪᓂᖓᓄᑦ.

ᐊᒥᓱᓄᑦ ᐃᓄᓐᓄᑦ, ᑕᕐᕋᐅᑉ ᓄᓇᖓ ᐱᐅᒋᔭᐅᓲᖑᕗᖅ. ᓱᓕᔪᒥᒃ ᓄᓇᖓ ᐱᐅᔪᒻᒪᕆᒃ, ᐅᕕᒐᕐᑐᐃᑦ ᐊᔪᐃᓐᓇᓯᑎᐅᓂᖏᑦ ᐅᕙᓐᓂ ᐱᒍᒪᓕᕐᑎᓯᓯᒪᔪᑦ. ᐃᓕᓐᓂᐊᑎᑦᓯᓂᖅ ᐅᑭᐅᕐᑕᑐᒥ ᐱᑎᑦᓯᓲᖅ ᐃᑎᔪᒥᒃ ᑲᑎᑎᑦᓯᓂᕐᒥᒃ ᐃᓕᓐᓂᐊᑎᑎᓐᓄᑦ ᑖᓐᓇ ᐱᓇᓱᖃᑎᒌᓐᓂᖅ ᑲᔪᓯᓂᓕᒃ – ᐅᕕᒃᑲᕈᕋᓗᐊᕐᒪᑕ – ᑲᔪᓯᔪᒥᒃ ᐱᖃᑎᖃᖏᓐᓇᓂᖅ ᐃᓅᓯᖏᓐᓂ ᓄᓇᖏᓐᓂᓗ, ᐱᐅᔫᔪᕆᒻᒥᔭᕋ ᐱᓇᓱᐊᕆᐊᒥᒃ ᓄᓇᖃᕐᖄᓯᒪᔪᑦ ᐃᓕᓴᕐᓂᓕᕆᓂᖓᓄᑦ, ᐱᑦᔪᑎᖃᕐᓱᓂ ᐱᑕᖃᑦᓯᐊᑐᒥᒃ ᐃᓗᕐᖁᓯᕐᒥᒃ ᐱᕙᓪᓕᐊᓯᒪᓂᓕᒻᒥᒃ, ᓇᓗᓇᖕᖏᑐᒥᒃ ᐃᓕᑕᕐᓯᓴᐅᑎᒋᒍᓐᓇᑐᖅ ᐊᒻᒪᓗ ᖃᕿᐊᕐᓯᓗᓂ ᐱᐅᖕᖏᓂᐊᓂᒃ ᖃᓪᓗᓈᑦ ᐃᓕᓐᓂᐊᓕᕆᓂᖏᓐᓂᒃ. ᑕᐃᒪᐃᒻᒪᑦ, ᐃᒪᐃᓕᖓᓂᖃᕐᖁᑦ, ᐃᓕᑕᕐᓯᔭᐅᓪᓗᐊᓲᖑᖕᖏᑑᒐᓗᐊᑦ, ᓯᕗᓕᕐᓂᖏᑦ “ᓄᑖᒥᒃ” ᐊᑐᕐᓂᖏᑦ – ᑐᖕᖓᕕᓕᒻᒥᒃ “ᓄᑕᐅᖕᖏᑐᒥᒃ” ᐱᐅᓯᕐᒥᒃ.

ᒥᑭᔫᓂᕃᓚᐅᕐᓯᒪᓚᖓᖕᖏᑲᓗᐊᕐᓱᖓ ᐱᓀᓗᑕᖏᓐᓂᒃ ᐱᓇᓱᐊᕐᓂᐅᑉ ᐅᑭᐅᕐᑕᑐᒥ, ᐅᓐᓂᑑᑦᔨᓚᕆᑉᐳᖓ ᑲᓇᑕᒥᐅᓂᒃ ᐃᓕᓐᓂᐊᑎᑦᓯᔨᓂᒃ ᐆᑦᑐᓂᕐᒥᒃ ᐱᒐᓱᐊᖁᑦᓱᒋᑦ. ᑲᓇᑕᓕᒫᒥ ᐅᖄᓂᖃᑦᓴᕋᑕᓕᕐᖁᒍᑦ ᐃᓅᖃᑎᒌᑦᓯᐊᓂᕐᒥᒃ ᐋᕐᕿᓱᐃᒋᐊᒥᒃ ᐊᒻᒪᓗ ᑕᑯᓐᓇᓂᕗᓐᓂᒃ ᖃᓄᐃᓕᓯᒪᓂᖏᓐᓂᒃ ᑲᓇᑕᓕᒫᒥ ᑭᖑᓂᕐᒥ ᑕᑯᕙᓪᓕᐊᓕᕐᓱᑕ. ᐱᐅᔪᒻᒪᕆᐅᓕᕐᖁᖅ ᐱᒍᓐᓇᐅᑕᑦᑎᓂᒃ ᑕᒪᐅᖕᙰᒋᐊᒥᒃ ᓄᓇᓕᒻᒧᑦ. ᐅᑭᐅᕐᑕᑐᖅ ᐃᓕᓐᐊᓂᑎᑦᓯᔩᓐᓂᐊᑐᖅ, ᐱᓗᐊᕐᑐᒥ ᐃᓱᒪᒍᓯᓕᓐᓂᒃ ᐅᒃᑯᐃᖔᕐᑐᓂᒃ, ᐃᓱᒪᒍᓯᓕᓐᓂᒃ ᑐᑭᖃᑦᓯᐊᑐᓂᒃ ᑐᑭᑖᕈᓐᓇᑐᓂᒃ, ᐊᒻᒪᓗ “ᐃᓕᑦᓯᓯᒪᔭᒥᓂᒃ ᐃᓕᑦᓯᓯᒪᒍᓐᓀᕈᓐᓇᑐᓂᒃ” “ᐃᓕᑦᓯᒋᐊᓪᓚᓂᕐᒧᑦ” ᐊᒻᒪᓗ ᐃᓚᐅᒍᓐᓇᓚᖓᔪᓂᒃ ᐊᓪᓚᓂᕐᓂᒃ ᓄᑖᓂᒃ ᓯᕗᑦᓴᒧᑦ ᓄᓇᖃᕐᑳᓯᒪᔪᓄᑦ ᐃᓄᓐᓄᑦ. ᐱᒻᒪᕆᐅᔪᕆᔭᕋ ᐊᒻᒪᓗ ᐱᑦᔪᑎᖃᑦᓯᐊᑐᒥᒃ ᐱᓇᓱᓐᓂᖃᕐᓱᓂ ᑕᒫᓂ ᒫᓐᓇᐅᔪᖅ. ᐱᓇᓱᐊᕋᑦᓴᖅ ᐊᑐᐃᓐᓇᐅᕗᖅ ᐃᓚᐅᓂᕐᒧᑦ ᐱᐅᔪᒥᒃ ᐊᓯᑦᔨᑐᐃᓂᕐᒧᑦ – ᐊᓯᑦᔨᑐᕐᑕᐅᓂᕐᒧᓗ ᐊᑑᑎᓗᑎᑦ.

ᒫᑭ ᒪᒃᑕᓂᐊᓪ
2017 ᐃᓕᓐᓂᐊᑎᑦᓯᔨᑦᓯᐊᖑᓂᕐᐹᖑᒍᑎᒥ ᐁᑦᑐᑕᐅᓯᒪᔪᖅ

ᑕᕐᕋᓕᐊᕐᓯᒪᕗᒍᑦ ᕿᓂᕐᓱᑕ ᐊᑑᑎᓂᕐᒥᒃ ᐊᒻᒪᓗ ᐃᓕᓐᓂᐊᑎᑦᓯᓂᕐᒥᒃ ᐊᑐᕐᓯᒪᓂᕐᒥᒃ. ᓯᕗᓪᓕᐹᒥ ᐆᑦᑐᕋᓚᖓᓂᕐᒥᒃ ᐊᕐᕌᒍᓂ ᐊᑕᐅᓯᕐᒥᒃ ᒪᕐᕉᓂᓪᓘᓃᑦ ᐃᓱᒪᖃᕐᓯᒪᕗᒍᑦ ᑕᒫᓂ ᑲᖏᕐᓱᒥ ᓴᐅᑦᔪᐃᑦ ᐃᓕᓐᓂᐊᕕᖓᓂ, ᑭᓯᐊᓂ ᐊᕐᓇᕋᓗ (ᐱᐊᕋᕆᓕᕐᑕᕗᓪᓗ ᒫᓐᓇ) ᐱᖓᓲᔪᕐᑐᓂ ᐊᕐᕌᒍᓂᒃ ᑕᒫᓂᓕᕐᖁᒍᒃ! ᐊᓕᐊᒋᔭᖃᕐᖁᒍᒃ ᐃᓕᓐᓂᐊᑎᑦᓯᓂᕐᒥᒃ ᐊᒻᒪᓗ ᑕᒫᓂᒥᐅᖑᓂᕗᓐᓂᒃ ᓄᓇᕕᒻᒥ ᐱᑦᔪᑎᖃᕐᓱᓄᒃ ᐊᑦᔨᐅᖏᑦᑐᒥ ᐃᓗᕐᖁᓯᕐᒥ ᐃᓅᓯᕐᒥ, ᖃᓂᑦᑕᕇᓐᓂᖏᓐᓂᒃ ᓄᓇᓕᓐᓂ ᐱᒍᓐᓇᐅᑎᓕᓐᓂᒃ ᐊᑦᑐᐃᓂᕐᒥᒃ ᐃᓕᓐᓂᐊᑎᐅᑉ ᐃᓅᓯᖓᓂ, ᐊᒻᒪᓗ ᐊᒥᓱᓂᒃ ᐱᑎᑦᓯᒍᓐᓇᑐᓂᒃ ᐱᓇᓱᒐᕐᒧᑦ ᐊᒻᒪᓗ ᐃᓕᓐᓂᐊᓂᓕᕆᓂᕐᒥ ᖁᕝᕙᕆᐊᕈᑎᐅᒍᓐᓇᑐᓂᒃ. ᓯᕗᓪᓕᐹᒥ ᐱᔭᕆᐊᑐᔫᓯᒪᔪᖅ ᖃᓂᖕᖏᑐᒥᐅᖑᓂᕐᒧᑦ ᓯᕿᓂᕐᒥ ᐱᐅᒃᑯᑎᓄᑦ, ᐊᓕᒋᓕᕐᑕᖃᕐᓯᒪᕗᒍᑦ ᐃᓅᓯᕐᒥᒃ ᐅᐃᒪᔮᕐᓇᖏᑦᑐᒥᒃ. ᐅᓐᓂᑑᑦᔨᕗᖓ ᑭᓇᑐᐃᓐᓇᒥᒃ ᐆᑦᑐᕋᕐᓂᒥᒃ ᐱᐅᓯᓕᒻᒥᒃ, ᐱᒍᒪᓕᕐᑎᓯᓂᕐᒥᒃ ᐃᓕᓐᓂᐊᑎᓂᒃ ᐱᒍᒪᔪᒥᒃ, ᐅᕝᕙᓘᓐᓃᑦ ᐱᒍᒪᔪᒥᒃ ᐊᑦᔨᐅᖏᑦᑐᒥᒃ ᐃᓕᓐᓂᐊᑎᑦᓯᓂᕐᒥᒃ ᐆᑦᑐᕈᒪᔪᒥᒃ ᐱᓇᓱᐊᕐᓂᒧᑦ ᑲᑎᕕᒃ ᐃᓕᓴᕐᓂᓕᕆᓂᕐᒥ. ᓇᓗᖕᖏᒪᕆᓪᓗᖓ ᐅᖃᕈᓐᓇᑕᕋ ᐃᓅᓯᕋ ᐊᓯᑦᔨᓚᕆᑦᓯᒪᔪᖅ ᑐᑭᑖᕐᓂᕆᓯᒪᔭᕋᓄᑦ ᐃᓅᓯᓕᒫᕋᓂ ᐊᑐᕐᓯᒪᔭᒃᑲᓂ.

ᓴᐃᒪᓐ ᑐᔭᒻᐱᑲᔅ
ᓴᐅᑦᔪᐃᑦ ᐃᓕᓐᓂᐊᕕᖓ, ᑲᖏᕐᓱᒃ

ᔮᓇᑦ ᔮᓐᔅᑕᓐᖑᕗᖓ ᐊᒻᒪᓗ ᐃᓕᓐᓂᐊᑎᑦᓯᔨᐅᕗᖓ ᐳᕐᑐᓂᕐᓴᓂ ᖃᓪᓗᓈᑎᑐᑦ ᐊᒻᒪᓗ ᐱᕙᓪᓕᐊᓯᒪᓂᕐᒥᒃ ᓄᓇᓕᖓᓂ ᐊᐅᐸᓘᑉ, ᓯᑕᐅᔪᕐᑑᒍᑎᒋᓕᕐᑕᖓ ᐊᕐᕌᒍᕐᒥ ᐃᓕᓐᓂᐊᑎᑦᓯᔨᐅᓂᕐᒪ ᐊᒻᒪᓗ ᐱᖓᓲᔪᕐᑐᓂᒃ ᐊᕐᕌᒍᕐᓂᑦ ᐊᐅᐸᓗᒻᒥᐅᖑᓕᕐᓱᖓ. ᑐᑭᑖᓚᐅᕐᓯᒪᔪᖓ ᐅᑭᐅᕐᑕᑐᒥ ᐃᓕᓐᓂᐊᑎᑦᓯᔨᐅᒍᒪᓂᕐᒥᒃ ᐳᕐᑐᓂᕐᓴᒥ ᓱᓕ ᐃᓕᓐᓂᐊᑎᑕᐅᖏᓐᓇᓱᖓ. ᑕᑯᓐᓇᓚᐅᕐᓯᒪᒐᒪ ᐱᐅᓯᖓᓂᒃ ᐅᓂᒃᑲᐅᓯᕐᒥᒃ ᐊᐅᓱᐃᑦᑑᑉ ᒥᑦᓵᓄᑦ ᑕᓚᕖᓴᒃᑯᑦ ᓄᐃᑕᑎᐅᑦᓱᓂ “ᓄᓇᒥ ᐊᒻᒪᓗ ᐃᒪᕐᐱᒥ” ᑕᑯᓐᓇᑎᑦᓯᒍᑎᒧᑦ ᐊᒻᒪᓗ ᐅᖃᓚᐅᑦᓯᒪᔪᖓ ᐃᓚᒃᑲᓄᑦ, ᐅᓪᓗᐃᑦ ᐃᓚᖓᓐᓂ ᐅᑭᐅᕐᑕᑐᒥᐅᖑᓛᕐᑐᖓ! ᐊᕐᕌᒎᒃ ᒪᕐᕉᓂ ᐃᓕᓐᓂᐊᑎᑦᓯᔨᐅᒌᕋᒪ ᑕᕆᐅᑉ ᐊᑭᐊᓂ ᖃᓪᓗᓈᑐᐃᓐᓀᑦ ᓄᓇᖓᓐᓂ ᐊᐅᓪᓚᑎᑦᓯᓚᐅᕐᓯᒪᔪᖓ ᐱᒍᒪᔭᐅᑎᒐᓱᐊᕈᑎᒥᒃ ᐊᒻᒪᓗ ᓯᓚᑖᓂ ᐊᓪᓚᓯᒪᔪᒥᒃ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ, ᐊᑐᐃᓐᓇᐅᓕᕐᖁᖓ ᐅᑭᐅᕐᑕᑐᒥ ᐊᑑᑎᓂᕐᒧᑦ ᐱᒋᐊᑦᓴᕋᑕᕆᐊᒥᒃ. ᖃᓄᐃᓕᒋᐊᕆᒍᑎᒋᒍᒪᔭᕋ ᐃᓕᓐᓂᐊᑎᑦᓯᔨᓄᑦ ᓄᓇᕕᓕᐊᖕᖑᓱᑦᑐᓄᑦ ᐃᓱᒪᒍᓯᖏᑦ ᐅᒃᑯᐃᖔᑦᓯᐊᖁᓗᒋᑦ ᐊᒻᒪᓗ ᐆᒻᒪᑎᖏᑦ. ᐳᐃᒍᕐᑌᓕᓗᑎᒃ ᐃᓕᓐᓂᐊᑏᑦ ᐃᓚᖏᑦ ᐃᓕᓐᓂᐊᕕᓕᐊᓲᖑᒻᒪᑕ ᐃᓕᑦᓯᒋᐊᕐᑐᓱᑎᒃ, ᐊᓯᖏᓪᓗ ᓇᓪᓕᒋᔭᐅᓂᕐᒥᒃ ᐱᒍᒪᑦᓱᑎᒃ. ᐊᒻᒪᓗᒋᐊᓪᓚᖅ, ᐱᐊᕃᑦ ᑭᖕᖒᒪᒋᔭᖃᕐᓂᐹᑦ ᓇᓪᓕᒋᔭᐅᓂᕐᒥᒃ ᐊᑐᓲᖑᕗᑦ ᓇᓪᓕᒋᔭᐅᒍᒪᓂᕐᒥᒃ ᓇᓪᓕᒍᓲᑎᐅᖕᖏᓂᕐᐹᒃᑯᑦ. ᐃᓄᑦᓯᐊᖑᒋᐊᖃᕐᖁᑎᑦ, ᓇᓪᓕᒍᓱᑦᓯᐊᓗᑎᑦ, ᐊᒻᒪᓗ ᐅᒃᑯᐃᖔᑦᓯᐊᓗᑎᑦ ᐃᓗᕐᖁᓯᖓᓄᑦ ᐃᓄᖏᓐᓄᑦ ᓄᓇᕕᒻᒥ. ᐃᓕᓐᓂᐊᑎᒃᑲ ᐅᕙᓐᓂᒃ ᐃᓕᑦᓯᑎᑦᓯᓯᒪᔪᑦ ᐃᓅᓯᐅᑉ ᒥᑦᓵᓄᑦ, ᐃᓕᓐᓂᐊᑎᑦᓯᓂᕐᒥᒃ ᐊᒻᒪᓗ ᐅᕙᓐᓂᒃ. ᐃᓕᑦᓯᓯᒪᕗᖓ ᓲᖑᔫᒋᐊᖃᕐᓂᒥᒃ, ᐊᔪᐃᓐᓇᓂᕐᒥᒃ, ᐅᐃᒪᔮᖕᖏᓂᕐᒥᒃ, ᐃᓄᑑᒍᓐᓇᓂᕐᒥᒃ, ᐱᓗᐊᕐᑐᒥ ᐱᒻᒪᕆᐅᑎᓪᓗᒍ ᐃᓄᑦᓯᐊᖑᓂᕐᒥᒃ ᐊᒻᒪᓗ ᐁᑦᑐᐃᓂᕐᒥᒃ. ᐃᓕᓐᓂᐊᑎᑦᓯᔨᑦᓯᐊᖑᓂᕐᓴᐅᓕᕐᖁᖓ ᐃᓄᑦᓯᐊᖑᓂᕐᓴᐅᓕᕐᓱᖓᓗ ᑕᒫᓃᓐᓂᑯᒐᓄᑦ ᑕᕐᓴᑲᓪᓚᐅᑉ ᐃᓕᓐᓂᐊᕕᖓᓂ.

ᔮᓂᐊᑦ ᔮᓐᔅᑕᓐ
ᑕᕐᓴᑲᓪᓚᒃ ᐃᓕᓐᓂᐊᕕᖓ, ᐊᐅᐸᓗᒃ

Back To Top